Starfsteymi Vísindagarða stækkar

Nýtt starfsfólk Vísindagarða. Frá vinstri: Gísli Karl, Íris Hrund og Sigfús Örn

Gísli Karl Gíslason hefur verið ráðinn til Vísindagarða sem verkefnastjóri fyrir starfsemi Vísindagarða með áherslu á stefnumótunarvinnu, samstörf og tækniþróun. Gísli er með bakgrunn í tölvunarfræði og hefur starfað fyrir innlend og alþjóðleg tækni- og nýsköpunarfyrirtæki.

Þá bættist Íris Hrund Þórarinsdóttir nýverið í teymið í nýrri stöðu samfélags- og samskiptastjóra þar sem hún mun m.a. sérstaklega hlúa að nýsköpunarsamfélagi Mýrarinnar í Grósku. Íris er menntaður verkefnastjóri með sérþekkingu á markaðsmálum og skapandi greinum, auk þess sem hún býr yfir áralangri reynslu úr frumkvöðlastarfsemi og rekstri.

Þá hafa Vísindagarðar einnig ráðið Sigfús Örn Guðmundsson sem verkefnastjóra með áherslu á uppbyggingu Djúptækniseturs og rannsóknarinnviða. Sigfús Örn er menntaður í alþjóðlegum markaðssamskiptum og tengslum við hagaðila frá Árósaháskóla og kemur úr starfi markaðsstjóra hjá Háskóla Íslands. Hann hefur einnig víðtæka reynslu úr alþjóðlegu vísinda- og viðskiptaumhverfi.

Þau Gísli Karl, Íris Hrund og Sigfús Örn heyra öll beint undir framkvæmdastjóra Vísindagarða og hafa þegar hafið störf, Gísli á síðastliðnu ári, Íris fyrr í vor og Sigfús nú í lok maí.