Vel heppnað stefnumót við gervigreind í Grósku
Berglind Einarsdóttir frá Bentt lagði áherslu á mikilvægi þess að skilja tengsl gagna og lögsögu.
Vísindagarðar stóðu fyrir afar vel heppnuðum gervigreindardegi, „Stefnumót við Gervigreind,“ þann 3. september síðastliðinn í Mýrinni, Grósku. Viðburðurinn dró saman fjölda frumkvöðla, háskólanema og sérfræðinga til að kynnast nýjustu straumum og framtíðarmöguleikum gervigreindar.
Dagskráin var metnaðarfull og sýndi fram á hvernig gervigreind er að breyta leiknum, allt frá hagnýtingu í rekstri og skapandi nálgun í tónlist til áskorana á sviði lögfræði og máttar tækninnar í mannauðslausnum.
Framtíðarsýn NVIDIA
Viðburðurinn hófst með lærdómsríkri vinnusmiðju í samstarfi við NVIDIA og Advania sem sýndi fram á hvernig megi beita gervigreind til að knýja fram nýsköpun og vöxt:
Ralph Stocker frá NVIDIA veitti innsýn í framtíð gervigreindartækni og innleiðingu AI-hugbúnaðar hjá einstaklingum og fyrirtækjum. Þá ræddi Isabella Gleerup frá NVIDIA við Ingimar Andersen frá Treble Technologies um áskoranir nýsköpunarfyrirtækja og mikilvægan stuðning NVIDIA við sprotafyrirtæki.
Isabella Gleerup frá NVIDIA ræddi við Ingimar Andersen frá Treble Technologies.
Fjölbreytt erindi
Eftir vinnusmiðjuna tók við fjölbreytt dagskrá þar sem sérfræðingar fjölluðu um hagnýtingu tækninnar:
Gervigreind sem „ofurkraftur“: Gísli Ragnar Guðmundsson (KPMG) líkti gervigreind við „ofurkraft“ sem gerir einstaklingum kleift að framkvæma margfalt meira en áður og ræddi um orkukapphlaupið sem nú stendur yfir í tæknigeiranum.
Lögfræði og gögn: Berglind Einarsdóttir (Bentt) lagði áherslu á mikilvægi þess að skilja tengsl gagna og lögsögu, sérstaklega þar sem stóru tæknirisarnir eru staðsettir utan Evrópu.
Máltækni og sýndarverur: Hannes Högni Vilhjálmsson (Háskólinn í Reykjavík) fjallaði um notkun gervigreindar í HR-lausnum, sýndarverum og máltækni.
Tenging við Evrópu: Morris Riedel (Háskóli Íslands) ræddi um ávinninginn af því að nota stórvirka tölvuvinnslu fyrir gervigreindarforrit á Íslandi.
Hagnýting í rekstri: Viðar Pétur Styrkársson (Advania) fjallaði um notkun gervigreindar í rekstri.
Tækni í tónlist: Þórhallur Magnússon (Háskóli Íslands) ræddi um skapandi tilraunir með gervigreind í tónlist.
Íslensk máltækni: Óttar Kolbeinsson Proppé (Almannarómur) tók dæmi úr íslenskri máltækni með fyrirlestri sínum „Happy birthday eða thmd?“.
Gervigreind í hafinu: Sigurður Bjartmar Magnússon (Greenfish) sýndi hvernig fyrirtækið notar gervigreind til að spá fyrir um tegundir í hafinu.
